حكايات رومانى مكرم 1

أنا جوزي مسافر فرنسا وبعتلي كل شهر 2500 دولار وعندي أختي أرملة وظروفها صعبة وبساعدها كل شهر بـ700 جنيه. وفي يوم أختي جت تطلب مني أزودلها المبلغ شوية عشان بنتها في ثانوية عامة وبتاخد دروس خصوصية. لكن ردي عليها كان صادم وقلت لها إنتي إزاي تدخلي بنتك ثانوية عامة وإنتي مش قد ظروفها؟ قالتلي دي بنتي الوحيدة ونفسي أشوفها أحسن مني. قولتلها أنا جوزي بيبعتلي 2500 دولار كل شهر وعندي بيت وعيال وبشتري دهب عشان أأمن مستقبل ولادي ومش هفضل أصرف على غيري. وقررت أوقف عنها الـ700 جنيه ومش هديها تاني. أنا اسمي سلمى ومتجوزة من سليم بقالنا 15 سنة وعندي ولد وبنت وجوزي مسافر فرنسا بقاله سنين وبيشتغل هناك وبيبعتلي كل شهر 2500 دولار. الحمد لله ربنا موسعها علينا وعندي شقة كبيرة وفرش غالي ودهب بشتري منه كل شهر. كنت دايمًا بقول إن ولادي لازم يكونوا مأمنين مستقبلهم ومش ناقصهم حاجة. أما أختي ندا فكانت أرملة من خمس سنين وجوزها مات وساب لها بنتها الوحيدة حنان. ندا كانت عايشة في شقة صغيرة في حارة شعبية وبتشتغل في البيوت عشان تعرف تصرف على نفسها وعلى بنتها. ومن سنة بدأت أساعدها كل شهر بـ700 جنيه وكنت شايفة إن ده كفاية وزيادة عليها. في يوم كنت قاعدة في الصالة بفرز الدهب اللي اشتريته جديد وفجأة سمعت جرس الباب. فتحت لقيت ندا واقفة قدامي ووشها باين عليه التعب. رحبت بيها ودخلتها وقعدنا شوية نتكلم عن أحوالنا لحد ما قالتلي وهي مكسوفة: ـ سلمى أنا عايزة أطلب منك طلب ومش عارفة هتوافقي ولا لأ. قولتلها: ـ خير يا ندا قولي. قالتلي: ـ هو ينفع تزوديلي المساعدة شوية؟ خليهم ألف ولا ألف وميتين جنيه بدل الـ700؟ استغربت وسألتها: ـ ليه؟ إيه اللي حصل؟ قالتلي: ـ حنان دخلت ثانوية عامة والدروس غالية أوي والمدرسين كل واحد عايز مبلغ كبير وأنا مش قادرة أوفر كل ده. بصتلها وقلت باستغراب: ـ وإنتي إزاي تدخلي بنتك ثانوية عامة وإنتي مش قد ظروفها؟ ما كان زمانها دخلت دبلوم وخلصت وشافتلها شغلانة تساعدك بيها بدل المصاريف دي كلها. ندا اتغير وشها وقالت: ـ دي بنتي الوحيدة يا سلمى ونفسي أشوفها متعلمة وتبقى أحسن مني. هو أنا عشان فقيرة أحرمها من حلمها؟ قولتلها ببرود: ـ وأنا مالي يا ندا؟ هو أنا هفضل أصرف عليكي وعلى بنتك؟ أنا جوزي بيبعتلي 2500 دولار كل شهر بس عندي بيت وعيال ومسؤوليات وبشتري دهب عشان مستقبل ولادي. ندا سكتت شوية وبعدين قالت: ـ أنا مش طالبة منك تصرفي عليا كلها يا سلمى أنا بس كنت فاكرة إنك هتقفي جنبي وقت ما أحتاجك. الكلام ضايقني وقلت لها: ـ خلاص يا ندا من النهارده مفيش الـ700 جنيه ولا غيرهم. أنا مش هديكي فلوس تاني وفري على نفسك مشوار المجيء هنا. ندا قامت من مكانها ودموعها في عينيها وقالت: ـ ربنا يرزقك يا أختي ويباركلك في ولادك. أنا رجعت أكمل ترتيب الدهب وقلت لنفسي إن ولادي أولى بأي جنيه من اللي معايا. لكن بعد خروج ندا بساعات حصلت حاجة غريبة. كنت قاعدة بتفرج على التليفزيون وفجأة تليفوني رن. لقيت سليم جوزي بيتصل بيا من فرنسا. رديت عليه وقلت: ـ حبيبي وحشتني عامل إيه؟ لكنه مردش على كلامي وسألني بصوت غريب: ـ سلمى هو ندا كانت عندك النهارده؟ استغربت وقلت: ـ أيوه كانت عندي وطلبت مني أزودلها الفلوس وأنا رفضت ووقفت عنها الـ700 جنيه خالص. سليم سكت شوية وبعدين قال: ـ إنتي عملتي كده بجد يا سلمى؟ قولتله: ـ أيوه طبعا هو أنا ناقصة مصاريف؟ دي بنتها عايزة تدخل ثانوية عامة وأنا مش هصرف على تعليمها. سليم اتنهد وقال: ـ سلمى أنا عايزك تسمعيني كويس ومتتكلميش قبل ما أخلص كلامي. حسيت إن في حاجة مش طبيعية وسألته: ـ في إيه يا سليم؟ إنت بتكلمني كده ليه؟ قال: ـ أنا كنت ساكت طول السنين اللي فاتت ومش عايز أفتح الموضوع ده لكن واضح إن الوقت جه ولازم تعرفي الحقيقة. قلبي بدأ يدق بسرعة وقلتله: ـ حقيقة إيه؟ رد عليا: ـ فاكرة إنك عارفة كل حاجة عن أختك ندا؟ قولتله: ـ أيوه طبعا دي أختي وأنا عارفاها من يوم ما اتولدنا. سليم قال بصوت واطي: ـ لأ يا سلمى إنتي متعرفيش عنها حاجة. وفي سر قديم بيني وبين ندا عمري ما قدرت أحكيلك عنه. اتصدمت من كلامه وفضلت أسأله عن السر ده لكنه رفض يتكلم في التليفون وقال إنه هيرجع مصر قريب ولازم نتكلم وش لوش. قفلت معاه وأنا مش فاهمة أي حاجة. لكن بعد شوية لقيت رسالة وصلتلي على الموبايل من رقم غريب مكتوب فيها: «لو عايزة تعرفي الحقيقة عن أختك ندا اسألي جوزك عن الفلوس اللي كان بيبعتها لها من وراكي طول السنين اللي فاتت». فضلت باصة للرسالة ومش مصدقة اللي قريته. إزاي سليم يبعت لندا فلوس من ورايا؟ وليه مخبي عليا؟ وإيه السر اللي بينهم؟ وفي اللحظة دي رن التليفون مرة تانية ولما رديت سمعت صوت ست بتقولي: ـ إنتي سلمى مرات سليم؟ قولتلها: ـ أيوه مين معايا؟ ردت الست وقالت: ـ أنا واحدة تعرف الحقيقة اللي جوزك مخبيها عنك وصدقيني لو عرفتي اللي حصل زمان مش هتصدقي إن أختك ندا عملت كده. وقبل ما أسألها أي سؤال قفلت السكة. فضلت طول الليل مش عارفة أنام وكل اللي في دماغي سؤال واحد. فضلت ليلة كاملة عيوني مغمضة بس دماغي شغال زي الساعاتي. كلام سليم الغامض، الرسالة اللي وصلتني من الرقم الغريب، ورسالة الست اللي كلمتني في التليفون.. كل ده كان عامل زي الحجارة اللي بترمي في مياه راكدة فتقلبت الدنيا في دماغي. تاني يوم الصبح، مكنش عندي طاقة لأي حاجة. لا فتحت دولاب الدهب ولا بصيت على الدهب اللي كنت بفرزه وكنت شايفة روحي فوق الناس بسببه. كنت حاسة بقبضة في قلبي ومش قادرة أستنى لحد ما سليم ينزل مصر. مسكت التليفون ورجعت اتصلت بسليم أكتر من مرة، بس تليفونه كان مقفول. ده زود توتري وقلقي أكتر وأكتر. فضلت قاعدة في الصالة لوحدي، الولاد كانوا في المدرسة، وكل شوية أفتكر كلام ندا وهي بتقول بدموع: «هو أنا عشان فقيرة أحرمها من حلمها؟» وكلماتها وهي ماشية: «ربنا يرزقك يا أختي ويباركلك في ولادك». حسيت إن في نبرة صوتها مكنش فيها كره ولا حقد، بالعكس.. كان فيها نوع من أنواع الشفقة أو يمكن القهر اللي أنا مكنتش فايقالها ولا مهتمة أفهمه. بعد العصر، سمعت جرس الباب بيرن. قلبي نط في صدري. جريت على الباب مفكرة إن سليم رجع فجأة من السفر أو إن ندا رجعت تانی. فتحت الباب بسرعة، بس المرة دي مكنش سليم ولا ندا. كانت ست غريبة، شكلها وقور وعليها سيما الستر، لابسة عباية سوداء وبان على وشها إرهاق السفر أو المشوار الطويل. بصتلي بعيون مليانة حزن وقالت بصوت هادئ: ـ إنتي سلمى؟ بصتلها بتوتر وقلت: ـ أيوه، أنا سلمى.. حضرتك مين؟ وعرفتيني منين؟ دخلت الست بخطوات بطيئة من غير ما تستأذن، وقعدت على أول كرسي قابلها في الصالة وهي بتاخد نفسها بصعوبة. بصت حواليها في الشقة الواسعة والفرش الغالي، وبعدين بصتلي وقالت: ـ أنا اللي كلمتك امبارح بالليل في التليفون.. واسمي امينة. عقدت حواجبي وسألتها بحدة شوية لأني مكنش فيا طاقة للضباب ده: ـ أمينة مين؟ وإيه اللي جابك عندي؟ وعرفتِ رقمي منين؟ وايه حكاية سليم وندا اللي مش عايزة تخلص دي؟ أمينة هزت رأسها بابتسامة حزينة وقالت: ـ اجهدي نفسك شوية يا سلمى، واقعدي اسمعي الكلمتين اللي جاي أقولهم لك، لأن لو مسمعتيش مني دلوقتي، هتعرفيهم بعدين بس متأخر أوي، ساعتها الندم مش هيجيب نتيجة. قعدت قدامها على الكرسي وأنا حاسة أنفاسي بتضيق. قلت لها بصوت مهتز: ـ اتكلمی.. سامعاكي. مين ندا بالنسبة لجوزي؟ وإيه حكاية الفلوس اللي كان بيبعتها لها من ورايا؟ أمينة تنفسعت بعمق وقالت: ـ قبل ما سليم يسافر فرنسا بخمس سنين، وقبل ما أنتم أصلاً تتجوزوا وتستقروا.. أنتي تعرفي سليم كان بيشتغل إيه في الأول؟ قولت بسرعة: ـ أيوه طبعاً، كان محاسب في شركة تعبانة هنا، وقبل ما نسافر أو هو يسافر سافر عشان يحسن دخله. أمينة هزت رأسها وقالت: ـ لأ.. مش دي الحقيقة كلها. سليم كان بيشتغل في نفس البلدة أو الحي اللي كانت عايشة فيه ندا وجوزها المرحوم. وكان بيحب ندا حب جامد جداً، وكانوا متفقين على الجواز. اتصدمت لدرجة إن الكرسي حسيت إنه بيميل بيا. صرخت بصوت عالي: ـ إنتي بتقولي إيه؟! سليم كان بيحب مين؟! ندا؟! أنتي مجنونة ولا بتجيب الكلام ده منين؟! سليم متزوجني أنا من ١٥ سنة، و.. قاطعتني أمينة ببرود وقالت: ـ اسمعي للاخر يا سلمى. سليم كان بيحب ندا، وفعلاً اتقدم لها، بس أهل ندا رفضوه في البداية لأنه كان على قد حاله وماعهوش يفرش شقة ولا يعمل شبكة، وهي غصباً عنها سمعت كلام أهلها واتجوزت راجل تاني اللي هو أبو بنتها حنان. سليم اتهد تماماً وقتها، وسافر فرنسا وهو منكسر ومجروح، وقابلني هناك، وحكالي كل حكايته مع ندا.. إزاي كان بيحبها وإزاي هي ضاعت من إيده. دموعي نزلت غصب عني، ومشاعري كانت متلخبطة بين الغضب والغيرة والذهول. سألت بصوت منهار: ـ وإيه اللي جابه ليا بعد كده؟ ليه اتجوزني أنا؟ أمينة بصت في عيني مباشرة وقالت: ـ بعد ما سافر بكام سنة، وقرر ينزل مصر إجازة، قابل ندا بالصدفة.. لقى جوزها مات وسابها فقيرة وغلبانة وبتربي بنتها في حارة شعبية وفي ظروف صعبة جداً. ساعتها حنّ لها قلبه القديم، ولقى إنها محتاجة مساعدة حقيقية مش مجرد كلام. بس هو كان عارف طبعك كويس يا سلمى.. عارف إنك طموحة وبتحب الفلوس والدهب وبتدقق في كل قرش، ولو عرفتي إنه بيبعد جزء من فلوسه لمساعدة حب طفولته اللي ضاعت منه، هتقومي الدنيا ومش هتقعديها. كدّبت وداني وقلت بصريخ: ـ تقولي إن الـ 2500 دولار اللي كان بيبعتهملي كل شهر، كان بيطلع منهم فلوس لندا من ورايا؟! أمينة كملت بصوت ثابت: ـ مش بس كده يا سلمى.. سليم كان بيبعت لندا كل شهر مبلغ ثابت من فلوسه الخاصة اللي بيشقا فيها هناك في فرنسا، ومكنش بيحرمك أنتي ولا أولادك من حاجة، بالعكس، كان بيبعتلك كفايتك وزيادة، والباقي كان بيبعته لندا عشان تستر نفسها وبنتها حنان، وميرضاش يشوفها بتشتغل في البيوت زي الخدامة وهي في الأصل كانت في يوم من الأيام حب عمره اللي متجوزهاش! حسيت إن الدنيا بتلف بيا. كلام أمينة كان نزل على دماغي زي الصاعقة. ندا اللي كنت مستحقرتها ومستهينة بيها وبظروفها، واللي طردتها امبارح وقطعتا عنها الـ700 جنيه، طلعت هي الست اللي جوزي بيحبها من سنين ولسه شايل لها مكان في قلبه، وكان بيبعتلها من ورايا! قبل ما أنطق بحرف واحد، التليفون رن على الترابيزة. بصيت للتليفون لقيته "سليم". مسكت التليفون بسرعة وفتحت الخط، وصرخت فيه وأنا منهارة من العياط: ـ إنت فين يا سليم؟! كل ده وبتكدب عليا؟! ندا.. ندا دي تبقى إيه بالنسبة لك؟! وأمينة هنا عندي في البيت حكت لي كل حاجة! سليم سكت على الجانب التاني من الخط لفترة طويلة، وبعدين سمعت صوته مرهق وضعيف وهو بيقول: ـ أنا في المطار يا سلمى.. لسه واصل مصر من دقايق، ورايح على بيت ندا أطمن عليها بعد ما قلتيلي إنك طردتيها وقطعتي عنها الفلوس.. وبعدها جاي لك عشان نتكلم وجهاً لوجه زي ما وعدتك. قفلت التليفون في وجهه من غير ما أرد، وبصيت لأمينة اللي قامت من مكانها بهدوء، وفتحت باب الشقة ونزلت بهدوء كأنها أدت رسالة وجبتها. بقيت لوحدي في الشقة الواسعة، وسط الدهب اللي ملوش أي طعم، وأنا حاسة إن حياتي كلها اللي بنيتها على الوهم والغرور بانهارت قدام عيني في لحظات.