نزلت للشارع وسمعت أخت طليقها بتصرخ من البلكونة: “امسكوا الولية!! بتسرق الولد!”
الناس في الشارع بدأت تتلفت وتتجمع، وشابين من المنطقة بدأوا يجروا ورايا. بقيت أدخل في الشوارع الضيقة والمداخل وأنا شايلة الولد اللي بيبكي، وركبي بتخبط في بعضها من التعب والخوف. استخبيت ورا مدخل بيت قديم ومقفل بالخرابة، وحطيت إيدي على بؤ الولد وأنا بنهت بصوت طالع بالعافية وميتة من الرعب، والناس بتجري في الشارع الرئيسي بيدوروا عليا.
قعدنا مستخبيين في الضلمة والتراب يجي نص ساعة، والولد مكلبش فيا وبيترعش. لما الجو هدي خالص، طلعت المتخفية وركبت توكتوك بعيد عن المنطقة كلياً، وطلعت بيه على المستشفى العام رأساً.
وصلت للمستشفى وأنا رجليا مش شايلاني، دخلت المبنى ووصلت لأوضة بنتي. الدكاترة والممرضات أول ما شافوني شايلة الولد وغرقانة في العرق والتراب اتصدموا. جريت على سرير بنتي، وقربت الولد منها وناديتاها بصوت بيترعش ونازل منه الدموع: “بنتي.. يا حبيبتي.. انظري مين معايا! جبتلك محمد.. جبتلك ضناكي والله جبتوهولك يا بنتي فتحي عينيكي!”
الولد أول ما شاف أمه نايمة والأجهزة حواليها، افلت من إيدي ورمى نفسه على صدرها وبدأ يبكي ويصرخ بصوت يهز الجبال: “ماما! صحي يا ماما.. أنا محمد! تعالي نمشي يا ماما!”
في اللحظة دي.. حصلت المعجزة اللي أطباء المستشفى كلهم وقفوا يشهدوا عليها. صوابع بنتي الباردة بدأت تتحرك ببطء.. جفن عينها بدأ يرتعش، وبدأت تفتح عينيها ببطء شديد. لما وقعت عينها على وش ابنها اللي نازل دموعه على خدها، خط النبض في الجهاز بدأ يتسارع، وصدرها بدأ يعلى وينزل بنفس قوى.
رفعت إيدها المربوطة بالشاش بالعافية وحطتها على رأس ابنها، وجمعت روحها وقالت بصوت ضعيف جداً ومبحوح: “مـ… محمد؟ حبيبي؟”
حضنت الولد بكل قوتها وبدأت تبكي، والذاكرة بدأت ترجع لها تدريجياً مع دقات قلب ابنها في صدرها. الدكاترة دخلوا يتفحصوها وهم مش مصدقين إن الحالة الذهولية انفكّت بالسرعة دي.
كنت واقفة في زاوية الأوضة وببكي بنحيب، حاسة إن ربنا أداني فرصة ثانية أتنفس فيها. بس الفرحة دي ما كملتش حتى نص ساعة..
فجأة، الباب اتفتح بقوة، ودخلت الشرطة ومعاهم طليقها وأمه، والضابط بيمسك كلبشات في إيده وبص لي وقال بصوت جاف وحاسم: “هي دي الولية اللي اختطفت الطفل واعتدت على ناس في بيتهم.. هاتوها!”
وقف الضابط في وسط الأوضة والكباشات في إيده، وطليقها واقف وراه وعينه حمرة زايغة من الغل، بيشاور عليا بصابعه ويصرخ: “هي دي يا باشا! المجنونة دي اقتحمت بيتي وضايقت أختي وخطفت الولد، وأنا مش هسيب حقي للقانون!” أمه كانت واقفة جنبه بتهلل وتصوت: “الولد ابننا والمجنونة دي سرقته، دي لازم تتعفن في السجن!”
الممرضات اتخضوا والدكاترة اتجمعوا في الأوضة، وبنتي أول ما شافت منظره وسمعت صوته، مسكت في الولد بأيديها الاتنين ودموعها نزلت زي المطر، وصصرخت بصوت مبحوح ومرعوب: “لا! أرجوك يا باشا، ده ابني! ده حتة مني، أمي ما سرقتش حد، أمي رجعتلي روحي!”
قرب الظابط مني وأنا واقفة في مكاني زي الجبل، ما اتهزتش ولا خفت. الندم اللي أكل في عظمي والأيام السودة اللي شفتها خلتني ما أخافش من السجن ولا من أي بشر. رفعت إيدي للظابط وقولتله بصوت ثابث ودموعي على خدي: “اكلبش يا باشا.. اكلبش واعمل اللي تعمله، أنا فعلاً دخلت أخدت الولد، بس ما سرقتوش.. أنا جبت الولد لأمه اللي كانت بتموت في العناية بسبب قسوة بني آدمين ما عندهمش رحمة.”
الظابط بص للولد اللي مكلبش في رقبة أمه ونازل بكاء، وبص لبنتي اللي الوش بتاعها زايغ وجسمها كله بيترعش من الخوف والمحاليل مربوطة في إيدها. الظابط كان راجل كبير في السن، وعينه فيها حكمة ونظر للحالة كلها بفطرة. بص لطليقها وقال له بصوت ناشف: “استنى عندك يا أستاذ.. الولد مع أمه في المستشفى، وأم الولد في حالة صحية حرج وما ينفعش الولد يتحرك من هنا دلوقتي. وحضرتك جشعت وعامل بلاغ محضر خطف، تعالى معانا على القسم عشان نعمل المحضر ونستمع للطرفين.”
طليقها صرخ بغضب: “يعني إيه يا باشا؟! ده ابني وأنا اللي معايا الحق والمحاكم!”
رد عليه الظابط بنفس النبرة الحازمة: “لما المحكمة تحكم لك بحضانة ابقى تعالي اتكلم، إنما الولد حالياً في حجر أمه، وحضرتك مش هتستقوى بالقانون على واحدة في العناية المركزة.”
أخدوني على قسم الشرطة، وطليقها وأمه جايين ورايا يتوعّدوا ويهددوا. دخلت التخشيبة، وقعدت على البلاط البارد، بس المرة دي ما كنتش مكسورة.. كنت حاسة بنار هادية جوه صدري، كنت مطمنة إن بنتي فتحت عينها، وإن الولد في حضنها حتى لو كان لعدة ساعات.
في التخشيبة، اتعرفت على محامي شاب كان جاي يزور موكل ليه، حكيت له القصة من أولها؛ من يوم ما طردها وقالي “أنا أخري معاكم المؤخر”، لحد ما بنتي قطعت شرايينها، ولحد ما دخلت بيتهم وأخدت الولد. المحامي بصللي بصدمة وشفقة، وقال لي: “يا حاجّة، اللي عملتيه قانوناً يعتبر دخول مسكن بغير إذن واعتداء، بس وضع بنتك وطردها وحرمانه ليها من ابنها في الظروف دي، ومحاولة انتحارها، دي كروت قوة في أيدينا قدام النيابة. أنا همسك القضية دي لوجه الله، ومش عايز منك ولا مليم.”
تاني يوم الصبح، اتعرضنا على النيابة. وكيل النيابة كشف على المحضر، واستمع لأقوال طليقها اللي كان بيكذب ويقول إن إحنا رمينا الولد عليه وإن بنتي سابته عشان تتجوز. هنا المحامي بتاعي اتدخل، وطلع تقارير المستشفى العام، وتقرير حالة الانتحار، والتقرير الطبي لقطع الشرايين، وفقدان الذاكرة المؤقت، وأثبت إن البنت كانت بين الحياة والموت بسبب حرمانها من طفلها.
المحامي وقف وقال قدام وكيل النيابة: “يا سيادة المستشار، المتهمة أم ومربّية، تصرفت بدافع الأمومة والإنقاذ العاجل لحياة ابنتها. والطفل في سن الحضانة الوجوبية طبقاً للقانون، وأبوه طرد الأم وحرمها منه بغير وجه حق. نطالب بإخلاء سبيل الجدة، وبإثبات حضانة الطفل للأم وتوفير حماية لها.”
وكيل النيابة بص لي وسألني: “أنتي دخلتي البيت واعتديتي على أخت المجني عليه؟”
رديت وأنا ببكي: “يا سيادة المستشار، أنا زقيتها عشان ألحق أخرج بالولد قبل ما يتلموا عليا، أنا ما ضربتش حد ولا سرقت حاجة، أنا أخدت حفيد ابن ٣ سنين من حجر ناس قاسية عشان ألحق أمه قبل ما تطلع روحها.”
وكيل النيابة أمر بإخلاء سبيلي بكفالة مالية على ذمة القضية، وأمر بتسليم الطفل لأمه فوراً وتكليف المباحث بعدم التعرض للأم أو للطفل لحين البت في قضايا الحضانة والنفقة!
خرجت من القسم وأنا مش مصدقة، المحامي جه معايا وطلعنا على المستشفى. دخلت الأوضة، لقيت بنتي قاعدة على السرير ومسندة ضهرها، والولد في حضنها بيلعب في شعرها. أول ما شافتني دخلت، عينها جت في عيني..
المرة دي، عينها مكنتش فاضية ولا ميتة.. عينها كانت مليانة دموع، بس دموع عتاب وحزن عميق. قربت منها ببطء، ونزلت تحت رجليها على بلاط الأوضة، ومسكت قدمها وبستها وأنا بنحب: “سامحيني يا بنتي.. والله العظيم كنت جاهلة وكنت خايفة من الفقر، بس ربنا يعلم إني فديتك بعمري وحريتي.. سامحيني يا ضنايا.”
بنتي قعدت تبصلي بفرط الحزن، ونزلت إيدها المربوطة بالشاش وحطتها على كتافي، وقالت لي بصوت مبحوح طالع بالروح: “قومي يا أمي.. قومي، أنا مش زعلانة منك عشان الفقر.. أنا حزنت عشان استخصرتي فيا الأمان، وأنا ماليش في الدنيا غيرك.”
مسكت إيدها وبستها ألف مرة، وقعدنا نعيط إحنا الاثنين والولد في حضننا. وفي اللحظات دي، الدكتور دخل وقال إن حالة بنتي استقرت ونقدر نخرجها على البيت، بس محتاجة راحة تامة وعناية نفسية.
رجعت بيها البيت، الشقة اللي كانت شهدت على الكابوس والدم. بس قبل ما نتنفس الصعداء ونفكر هنعيش إزاي، اتفاجئنا باللي حصل..
طليقها مكنش سكت، وأمه غلها زاد بعد قرار النيابة. عرفنا إنه استغل وجود المحامي بتاعه وعمل خطة خبيثة ومسمومة؛ رفع قضية “إسقاط حضانة” فورية عن بنتي بتهمة إنها “غير أمينة على تربية الطفل لأنها حاولت الانتحار ومريضة نفسياً”، وجايب شهادات طبية مزورة وشهود زور من منطقته يهددوا إن البنت مجنونة وتشرك الطفل في خطورة!
مش بس كده.. في نفس الليلة اللي رجعنا فيها، سمعنا خبط مرعب على باب الشقة في نص الليل، ولما فتحنا الباب، لقيت رسالة تهديد متسابة ومكتوب فيها بالدم: “الولد يا هيرجع بالذوق، يا إما المرة دي مش هقطع شرايينها.. المرة دي هتاخدوا !”
